Fasnacht 07 (15.02.07-21.02.07)

Das Johr hemer üsi 3. Fasnacht öberstande. Es send am Samstig vorde Fasnacht zwar erschti Zwiifel ufcho vo gwössne, öbmer fertig werd, aber s hed jo zom Glöck alles klapped ond mer send fertig worde, au wenns stressig worde esch. Das Johr esch för üs ded döre genial gse, dassmer definitiv ufgno worde send vode Vereinigte ade DGV 07 (D Föteli gfendet ehr onder “Onderwägs”) ond doch uf 10 Nase agwachse send. Zerscht semer z 11te gse, doch us jobtechnische Grönd hed leider eine vode Spetzehandwärker, de Sämi Büchler, müesse es paar Woche vorde Fasnacht usträte. Öbis witers wo negativ gse esch esch gse, dass üs s LFK das Johr ned hed welle am Omzog debi ha. Wobi ech d Meinig vertrete, dass sech s LFK demed sälber en Arsch besse hed. Hemer au so medbecho vode Lüüt här, be gwössne Guggene ond sogar emene Medgled vode altigsässne Rätschhäxe: Ded hed die ned Ufnahm am Omzog zo Onverständniss gfüehrt. Allgemein, dör ned Ufnahm vo vellne jonge Groppene, häts gli zomene Omzogsboykott gfüehrt vo einige Groppene. :-) Aber mer bewärbed eus au das Johr ond hoffed, dass s LFK das Johr doch au weder en gnueg jonge Groppene d Chance ged, sech chöne am Lozärner Omzog z präsentiere. Was das Johr genial gse esch: Mer send s erscht Mol am Littaueromzog debi gse. Ond so öbis genials hani sälte erläbt. Esch werkli genial gse ond mer wärded au s nöchscht Johr gärn weder medmache am Littauer Omzog. Au s Fäschtli nochhär, werkli super. Allgemein hemer das Johr doch einigi neue Sachene gmacht, z.Bsp. Semer das Johr bem Guuggali debi gse, als offizielli Groppe (Es paar Föteli gfendet ehr onder “Onderwägs”) med üsem Motto „Die magischen Sahnetaucher“, mer hend ade Tropeblochete de Tropis be ehrem Alass gholfe ond am Fasnachtssamstig semer das Johr au, als Chrienser Verein, z Chriens ufem Dorfplatz gse ond hed chle gfäschtet. Dör das, dass s Wätter genial gse esch, allgemein en gueti Stemmig gse esch etc, werkli en geniali Fasnacht, wenn au die Vereinigte de Schwaneplatz ruhig chle me hätted chöne beläbe. Dör das, dassmer das Johr ned am Lozärner Omzog gse send, bzw. ned als offizielli Nommere, hemer leider keis Omzogsspröchli zo eusem Sujet „Das grausame Geheimnis des Vierwaldstättersees“.

Zurück zur Homepage